脸书专页
翻墙交流电报群
RSS/FEED订阅
简体
正體
English
日語
한국어
Deutsch
Français
Русский
Español
Italiano立场人语：6.9 到 9.2 最漫长之夏 香港中学生怎样走过血泪交织的暑假？
转自：新世纪，文章内容并不代表本网立场和观点。
9 月 2 日，一年一度的开学日，意味着暑假结束，新学年开始。
对不少香港中学生来说，这个暑假似乎前所未有地漫长。波澜壮阔的「反送中」运动中，一群未成年抗争者尤其引人注目。与过去的中学生运动不同，在今次走出来的中学生没有组织、抗争激烈程度亦无先例可循，这群少年却比以往的中学生走得更前、也更勇敢。
时晴时雨的漫长炎夏，香港中学生们走过一条血泪交织的抗争路。
（图中学生不是受访者）
《立场新闻》在「反送中」运动的多个关键现场，捕捉中学生面貌。从六月到八月，他们怎样由无忧无虑的孩子，成为参与示威集会的和理非，再陆续走上前线与警对峙，面对枪林弹雨，坚定向前？
开学了，让我们一同回顾这个荆棘满途的暑假，看他们如何在前所未见的逆境之中，重新理解、认识自己，与他们生长的这个城市。
为保护受访者身份，以下均为化名。
* * *
6.12 包围立法会 Martha 中二（14 岁）
中二生 Martha（化名）
Martha 是名校生，六月初在 Telegram 加入反送中的中学生地区群组，与区内志同道合的中学生一起派传单、摆街站。6 月 12 日，Martha 在夏悫道上，与这群认识一周、却因为摆站日见夜见的朋友，一同狂食催泪弹、直面警察暴力。
我加入咗某一区嘅中学生 group，喺当区派丝带、传单…大家都系素人，真系胆粗粗试吓。同佢哋只系识咗个几礼拜就一齐食弹，我觉得好难得。
6 月 12 号考中史，第二日仲要考 Bio，但我冇理到，攞埋 Bio 去温，坐喺海富天桥底。本身都系叫吓嚣，帮手传送物资咁；睇连登知下午三点有嘢发生，但自己香港梗系自己拯救架啦，就觉得都冇嘢好惊。三点几，扔咗第一粒催泪弹，好多人中招，我哋就攞住一大堆生理盐水、水，过去系咁冲、系咁冲。
四点左右，佢扔咗粒好大嘅催泪弹，你见到所有人好惊恐，系咁尖叫，系咁冲冲冲走，但唔知去边度避难好，周围都系烟；我哋顶唔顺跑咗落金钟地鐡站避，但地铁站都好大烟，真系好辛苦，只眼睇唔到嘢，眼水系咁标，成块面好「嗱」。
我觉得 6.12 啲人好勇武，去前线挡住佢防线嗰啲，好值得尊重。
我以前觉得香港人唔系咁热情，唔系好互助互爱，扶阿婆嘅人都冇乜。但经过今次，我改观，觉得香港人真系好团结，200 万人上街系一件好难得嘅事。香港生活步伐真系太快太繁忙，有啲人就觉得系港猪，因为佢哋唔肯放低身边嘅事物去关心香港，但今次可以话畀人听唔系。
美孚
派传单时我哋流晒汗，不断有人同我哋讲加油，又系咁买食物饮品攞过嚟。有啲老人家行埋嚟话我哋系香港嘅希望，靠晒我哋，好 warm。
如果唔去做呢啲嘢，其实 feel 唔到呢种人情味。
以前我都只关心去边度食、边度玩，但而家觉得，香港嘅未来真系喺我哋呢一代人手上，唔可以唔理呢件事。
我读历史知道，要民主，首先要有权选择自己嘅 leader，每个人都系 equal，可以投票，制度要公平公开公正。当主流民意觉得个 leader 唔适合，我哋有权去 rebel。
我觉得中国有啲恐怖。司法制度好有问题，共产党控制过大。中国人民冇自由，冇权选择要唔要习近平，教育又有问题，言论又打压得好厉害，无知到会觉得党就系一切。我唔系咁锺意中国……其实平时都系讲「支那」。
我觉得梁天琦系人民英雄。2016 嗰阵仲细，听唔明佢讲乜，净系觉得，系咁叫人冲做咩？唔好罗。呢排连登讨论返，先理解返佢以前所讲同做嘅嘢，我觉得全部都好有道理，但好可惜我哋暂时失去咗佢。
但要做勇武派，我觉得唔系而家，可能我哋呢个年纪，仲有好多嘢要谂。如果坐监、留咗案底咁点算？屋企人会点谂？日後成年了、冇呢啲 concern，我肯定会上前。
* * *
6.21 第一次包围警总 Mickey 中二（14岁）
中二生 Mickey（化名）
6 月 21 日，湾仔警察总部入口架起铁栏，栏外「黑警」、「仆街」之声此起彼落，数以万计黑衣示威者包围警总。铁栏最前面，几名一看便知是初中学生的站在第一排，Mickey是其中之一。他三岁随母亲从湖南来港，参与「反送中」运动，一直在「大陆人」身份与对香港的归属感间挣扎。
6.21 考完最後一科。考完试大家换衫就出去。
6.21 我企最前。我上连登睇到有啲女仔同我差唔多大，喺 6.12 企最前，我系一个男仔，咁我惊咩？佢写咗篇文睇到我好热血，跟住嗰日就同啲 friend 企最前。不过我发觉其实都冇乜好惊，啲人畀头盔我，我冇要，觉得好焗，佢都唔够胆打我哋架啦。
6 月 9 号我仲未清楚件事，但睇新闻见到，哗，一百万人上街，先开始关心。6.12 我有 friend 喺金钟，叫我出去，我到嗰边已经清紧场，一行出地铁站就闻到阵味，喺海富中心见到有人瞓咗喺度，只脚流晒血。商场门口，有个催泪弹掟中我哋附近，块面好痛、喉咙好似俾火烧咁，要合埋眼行落地铁站。
我觉得唔应该开枪罗，嗰日啲示威者，根本唔会对警方造成生命危险，示威者顶多都系掟铁通，根本唔会伤到警察。
好震撼，由细到大未去过现场，睇到咁多人，我觉得佢哋都系想为香港付出，我都希望自己做啲嘢。
其实我由细到大都想做警察，但 6.12 之後，我谂紧，做警察有咩用？
2019年6月21日，湾仔警察总部正门一段军器厂街，迫满示威人士
我喺大陆出世，三岁落嚟香港，小学、中学都系香港读；阿妈成日都提，要饮水思源。香港啲课本有讲中国点劲点劲，话咩 GDP 嗰啲，国家有咩壮举，讲中国嘅历史好劲，近代又有咩发展，细个觉得中国好劲，经济好好，世界强国。
我住上水。嗰时觉得闹我哋蝗虫啲人好衰，畀人闹蝗虫，感受梗系唔好。话畀 friend 知我大陆出世，佢哋会笑我「大陆哩」。我同香港出世嘅人有啲唔同，觉得自己系中国人，但系喺呢件事上好矛盾。反送中出现，我觉得中国政府唔系咁好，明明 set 定咗一国两制，但只要通过呢条条例，一国两制就会冇咗一部份，好唔公平啊对香港。
6.12 之後我阿妈话，唔好搞咁多嘢啦，你唔犯法就唔会畀人拉上去，叫我唔好再去游行；我上网睇过，如果你喺大陆犯法返嚟香港，会被引渡返大陆受审，听落冇乜嘢，但你系咪真系相信大陆嘅司法制度？佢咁多贪污。我唔想同阿妈嘈，但心谂，而家就话系犯事先会畀人拉上去，但将来就唔会咁简单，到时可以求其攞个藉口拉你上去都得。
我有用微信、抖音。但我上网睇过，如果喺抖音讲反中嘅嘢，讲偏激少少，就会畀人拉上去。唔知系咪真。
阿妈又会提我，你大陆出世，你系中国人。网上见到啲大陆人评论，大部份都觉得我哋系暴徒，觉得警察应该开枪杀晒我哋，点解我唔会有呢个想法？
虽然我未必系喺香港出世，但我喺香港生长咗十年，觉得自己算系一个香港人，所以我都会照样出去。香港人好团结，去到现场真系会 feel 到。我谂，香港经历咗呢件事之後，大家关系更加亲密，香港人同香港人之间。起码，我都有参与其中。
香港要有司法公义，要有独立机制，我觉得香港嘅法律系好嘅。香港应该 keep 住公平，keep 住自由，呢个就系香港同大陆嘅分别。
喺警总嗰日见到黄之锋。佢当年有份搞真普选，我觉得佢真系为咗香港。
梁天琦？系咪着蓝色衫，宣誓讲咗啲唔应该讲嘅嘢嗰个？
* * *
7.14 沙田区游行 Danny 中六（18岁）
7.14 沙田大游行
沙田区游行在黄昏演变成源禾路、乡事会路十字路口警民对峙，防暴警沿乡事会路推进，示威者在好运中心转角处向防暴警掟砖，後往新城市广场撤退。在撤退大队中，记者发现一手拖着一名少女（事後求证是女朋友）、一手握着砖头呼吁其他人撤离的 Danny。
6.12 有出嚟，之後嗰啲都有，所以叫做比较知要点做。其实前线好少嗌交，大多数都清楚咩情况要做啲咩，反而後面嗰班唔知情况嘅人，就惊，会闹交话退定唔退。
我有帮手起砖。啲人话咁就变咗袭警，但你决定咗要守、要占，起砖系无可奈何。大家一开始系手无寸铁，佢哋已经警棍催泪弹、胡椒喷雾，砖对嗰班警察有咩咁大影响呢？你班防暴警察有长盾有头盔，头盔特制架喎全部都。其实对佢哋嘅实际伤害系唔多。
扔水樽佢都讲系袭击警察啦，咁你扔水樽又系咁、扔砖又系咁，砖反而更加容易整到一大堆，令佢哋惊，叫做两手准备罗。香港人都慢慢接受紧呢样嘢。
警察同示威者实力太过悬殊，佢哋有警棍水炮车胡椒喷雾橡胶子弹布袋弹，大家真系随手拎住把遮，铁枝都冇，边度嚟咁多铁通啫？唯一可以挡下警察嘅就系砖。我唔排除真系有人为掟而掟、想发泄，但更多系为咗守住条线，你推到埋嚟，危害到我哋安全，我哋先会做呢样嘢。
我觉得游行系冇用，政府真系可以唔理你，所以我偏向做更激进嘅嘢。出得去大家都系为咗件事好，无论系想捻狗、想政府回应定想保住自己友，大家都系想反修例同五大诉求。但无论边个情况都好，出嚟之前应该谂清楚自己做咩，同评估下自己可以做啲咩。
出嚟其中一个原因，系因为 2014 年嗰阵我冇出到嚟。嗰时只觉得罢课好玩，好幼稚，今次见到咁多同我同年、甚至细过我嘅人，觉得，我唔出嚟仲系人嚟嘅？
由中环海滨事件已经见到，中共慢慢蚕食紧香港，立法会根本就唔系香港人嘅一个民主机构，连投票都未做就送出去。香港政府已经唔理我哋香港人，中共讲咩佢就做咩，然後就返去大陆叹世界。
我本来返紧暑期工，但辞咗职。如果冇呢件事，我会每日就咁返工放工，读完书就出嚟做嘢，做返个好普遍嘅香港人，唔会发崛到自己咁多嘢。其实出嚟系发崛到自己好多嘢，起码我唔系嗰啲受人唆摆、走就走、退就退、冲就冲、占就占嘅人，起码我会比好多人谂多一步。
我同所有同学基本上系断绝关系，一嚟好多警察嘅仔女，二嚟佢哋真系完全唔关心件事，返工嘅返工，返大陆玩嘅返大陆玩，我就逐个逐个 unfollow……有朋友话我「乜你咁得闲出去做呢啲？」我心谂，你自己唔捻做，讲到我无嘢做出嚟玩咁，令我更加唔想同佢哋有任何关系。我喺班 group 同佢哋拗交，佢哋扔咗我出去。
而家政府摆明同你打持久战，但我觉得香港人唔会咁易放弃呢件事，畀佢哋打压就算数。政府要玩几耐，我就同佢玩几耐。
* * *
8 月初 地区行动 Rory 中三（15岁）
中三生 Rory（化名）
年仅 15 岁的 Rory 在一次地区游行中 full gear上前线，警察推进时因「救人」而走避不及遭拘捕及落案起诉。每次行动，他都会带上遗书；但他说，参与运动带给他的改变，是令他更「乐观」了。
我都估唔到呢两个月，我由和理非变咗勇武…又唔算勇武嘅，都系企喺前线帮吓手。其实我觉得勇武唔止系掟砖或冲击，都要保护身边啲人。着得装备，就要保护身边冇装备嘅人。
（被捕当日）喺 XX 路口，警察长盾遮住，後面有班速龙，长盾退开班速龙跑出嚟，啲人一见到速龙就乱、散，我见到後面仲有两个人未走，冇 gear 咩都冇，唔知系吓呆咗定点。当时前线有部份人转咗场，有 gear 嘅兵力好少。 我见嗰两条友仲唔走咪冲上去扯佢走，扯完走嗰时，就畀速龙㩒低咗。嗰下呆咗，心入面讲咗句，顶，终於到我。
上车後有个人，阿 sir 问佢叫咩名，佢讲得好细声，个阿 sir 闹佢，条友驳咀，就畀人扯咗去後面打。打咗一两分钟，围殴，一个防暴一个便衣。嗰个防暴就系看住我嗰个，直接扯嗰条友嘅头发，一嘢挞去後面。我哋望咗几秒，有个阿 sir 话，望咩？再望打埋你，叫我哋耷低头。
去到警署，有三个（警员）见到我咁细个，走埋嚟同我倾偈，倾完之後话，其实你本质都唔系好坏，点解要走出嚟？佢哋问咗好多嘢，我拣嚟答。
落咗 charge，而家保释。我知再畀人拉会还柙，但好过坐喺屋企咩都做唔到。
眼罩猪咀盾护踭，买咗两千几蚊，系屋企人畀我食饭嘅钱，买到破产。我拎自制木盾，七层滑板压缩，拎去滑板舖整，已经被警棍打崩咗个角。第一次（做前线）系六月嗰时做遮阵，第二次系喷漆，第三次就做第一排拎盾，第四次就衰咗。
七月中，我有个 friend 俾人拉，喺警署畀人打，打得好甘，之後我劲嬲，就同佢讲会帮佢报仇，不过到而家都报唔到。虽然啲警察系仆街、抵死，但暂时都唔想伤害佢哋住，未去到一个战略上需要郁手嘅位，就唔郁住。
我净系憎滥用暴力嗰啲警察。有次见到有个女仔无啦啦畀人㩒低。嗰时真系想打，但要控制住自己，都少少难。最後有人直接撞低咗个警察拖佢走。同自己讲，如果做错一步就会影响咗成件事。
谴责黑警，独立调查委员会系好重要。至於撤回，如果佢真系唔撤，咪下次搞多佢一次。林郑，我觉得佢落唔落都系咁，话唔定下一个仲衰过佢。真普选，对我嚟讲冇咩所谓。想帮到前线啲人，救人又好咩都好，唔想睇到佢哋出事；（诉求）反而唔算太重要，最紧要帮到佢哋。
我谂嘢乐观咗。以前郁啲就话死，真系想死。後尾识咗个阿伯，佢同我讲咗四个钟，阿伯就系咁长气，喺龙和道；佢同我讲，死唔紧要，最紧要死得有价值。
呢度系我哋屋企，你唔为佢付出，仲有边个会为佢付出。我哋喺香港出世，点解要走？我会尽量留返条命，唔会送头。
而家好攰，都要继续顶落去。唉，唔想返学。
* * *
8.18 民阵 170 万人游行 Clara 中二（14岁）
818 夏悫道（图中不是受访者）
Clara 是身经百战的前线示威者，本文刊出之时，已数度与橡胶子弹擦身而过，两边手臂均留下伤痕。她每次出动均会带全副装备，头盔、猪咀，泳镜再加护目镜，全数戴上之後，几乎路也看不清。问到对未来的想像，她坦言连下一学年的事都没把握。
六月嗰时，真系好天真，觉得去游行政府可能理吓，但返到屋企，佢出咗个声明话唔会理，我成晚望住部电视，望住啲人畀人打。6月12号，我出去系想阻止佢条条例，唔知点解走咗上前线，有批人冲入立法会，佢就开始掟催泪弹。我未食过，硬食咗，就去洗眼，入咗中信……嗰晚系心死。本身警察嘅形象系保护市民，但系佢可以对一班人不停咁放催泪。6.12 之後，一两个礼拜冇瞓过，个画面不停出现。会不停谂件事、谂香港。由嗰日开始，我觉得和理非系冇用。
当我望住佢哋 full gear，戴晒头盔准备打交咁，香港市民畀钱交税畀你买身上面嗰套装备，其实佢哋系咪真系有必要搞到咁？我哋单纯出嚟争取五大诉求，其实系咪真系有必要对峙到咁？
对警察有种仇恨。
我所爱嘅香港，变咗质，或可能本身已经系咁，政府当道，警察变咗政治工具，一班人出嚟抗争，警察同政府畀出嚟嘅回应令人好失望。我本身谂嘅香港，唔系咁。
如果冇今次，我可以照样打机，呢个暑假咪做废青罗，出吓街咁。但系，未来系，点讲好呢？系未有目标嘅，但呢个暑假我起码有咗目标先。
（未来）返唔返到学都成问题啦。某啲时间，系要做某啲嘅嘢。
我而家 14 岁，咁你畀人拉咗，入咗女童院、或唔知会入乜嘢，你唔知自己会发生咩事架喎，亦望唔到自己前途，唯一可以做嘅就系……咁你要谂你嘅未来架嘛。同埋你唔会想像到入咗去会发生咩事。
如果真系发生（被捕）呢件事，还不如牺牲。
* * *
9.2 开学日 七号仔 中六（16岁）
831 大屿山
16 岁的七号仔，整个夏天无间断走上街头抗争。连开学前夕也入了机场，最後步行廿公里沿北大屿山公路离开。回家已是凌晨一时许，只睡了三小时就起床，穿上久违的校服，又和同学一同戴上 full gear 回校表态。路上遇见警察，他气上心头骂了两句，结果警察冲前，将他推到墙边，用手肘顶着他的後颈搜身，最後还惊动校方。
6.9 系我第一次参与游行。好记得学校的 LS 老师，当时撞正许志安偷食，又有逃犯条例。佢就话，我哋系咁管人家事，但连杀到自己身边、香港嘅事都唔理。我先开始反省，点解我净系理一啲闲事呢？我记得嗰日行咗 5 个钟，感受唔系好大，纯粹觉得，点解咁迫嘅条街？行完喺立法会门口坐咗一阵，第二日要考试，所以早走。
6.12 就好唔同。嗰日有啲同学连试都唔考，朝早八点就去。我着校服返学，但其实入面已经换咗黑色衫，书包摆咗条裤，考完试就即刻去。当然对住份卷都好惊，但更加惊佢哋喺金钟唔知发生咩事。嗰科我统测时攞 75 分，考试时得 40 几分，勉强合格。
最初我比较和理非，由七一起慢慢上得比较前。6.30 嗰日，听到有第二、三个义士自杀，我系咁爆喊，屋企人系咁问我咩事，我又答唔出。食完饭就出门口，最大动力令我即刻出去，系接唔到呢个事实。大学生，23岁，自杀死。我仲喺屋企他他条条凉冷气？我接受唔到。
之後开始企中前排灭烟。7.21 喺上环中哂，乸到一个地步，着咗长裤手脚都痛，颈位好痛好痛，第一次试到呢种感受。但痛痛下，就惯。8.3 在尖沙咀，装备唔系好得，净系用 6006，之後肚痛咗成个礼拜，行街都要停喺度抖，好辛苦。要睇义务医生，食完药，都系照出去啦，夹硬死顶啫。而家出去会用 half mask，7502，同埋 filter，60926，可以行得前啲。
暑假忙的另一个原因，系同同学搞罢课。搵校长倾，本来想喺操场集会，佢话惊隔离楼啲人高空掷物，保障唔到我哋安全。但我哋话有盖操场，佢又话唔得。我觉得佢系惊俾人睇到，因为操场出面街坊会望到入嚟。唯有喺礼堂搞，不过又禁止我哋影相拍低，就连举文宣咁基本嘅动作都唔得，你会有种冲动想企起身屌佢。
立场新闻图片
但开学嗰日，我都忍唔住。本身约好同学喺地铁站等，一齐着 full gear 返学。行行吓见到警察，我闹咗两次。有个白衫警员好激动咁话，「你企喺度！」要查我。我叫佢出示委任证，佢无，搜身时又用手肘㩒住我颈落少少的位置。有街坊见到，打咗去学校。事後班主任问我，你以前好冷静架，点解近排好似短咗路呢？
我认我系冲动咗，无谂後果。事後有啲内疚，你知而家警方完全唔公义，我当时着校服，万一佢以後一见到呢套校服就走去针对佢、盘问佢、查佢，咁点算？担心会连累我嘅师兄师弟。
其实我极度唔习惯开学。因为呢两个月嘅暑假，真系抗争得太长。之前出街全部都系 black bloc，我将套衫放喺屋企一个位置。9.2 开学，谂住搵校服，搵咗好耐都搵唔到。我对皮鞋，上年下学期开始已经烂烂地，本来话暑假换，但都未换。仲有，其实我功课基本上无掂过，咁样开咗学喇。我都唔知点算。
仲有 28 个礼拜就要考DSE，我自己都好紧张，我想入大学的。成班朋友都想趁中五呢个暑假发力追。但系真系救唔到，无呢个时间。嚟紧嘅日子，既然都无得救，不如都系继续抗争啦。
其实系意识到个危机，但香港比起自己的前途，边个更加重要？
8.24 牛头角
——立场新闻
发文者：吴一舟 发布时间：9/05/2019 12:39:00 下午
